Psa 105 | HUI | STEP | Iname Anduane Homogohondo turu howa ka̱i̱ lalu ibu daliga gibiore ka lalu lamiai hami̱ya. Wali agali hameigini dindi tara tarani paluyu pedaru ti bibahendehondo ibugua gibiore uruale biya laga bialu hale hai helo loyogo laga bimi̱ya.

1 Iname Anduane Homogohondo turu howa ka̱i̱ lalu
ibu daliga gibiore ka lalu lamiai hami̱ya.
Wali agali hameigini dindi tara tarani paluyu pedaru
ti bibahendehondo ibugua gibiore uruale biya laga bialu
hale hai helo loyogo laga bimi̱ya.
2 Iname ibunaga mini mo yaraga halu iba gana lalu hami̱ya.
Ibugua mbirale bayale bigi biyarunaga
bibahende hale hai helo laraga halu lamiai hami̱ya.
3 Anduane Homogo ibu mini tigabiore kago
ina ibunaga kamago iname ibuhondo turu hami̱ya.
Wali agali Anduane Homogohanda hame ledadagua biaga kamaru
ina turuho holene nga.
4 Anduane Homogohanda ina biamogo bilonaga ibu karia puabo hami̱ya.
Iname Anduane Homogo ibu kagoha kaware haparaho haabo hami̱ya.
5 Abarahama aguanene Anduane Homogonaga biabe bia hagane kamirubi
Yagabanaga aguanene Anduane Homogo ibunime dabene kamirubi
tígua Anduane Homogohanda manane tara tara agalime nabiagane ale bigi biyarubi
wali agali ko biaga hearuhondo pani migi biyarubi
mitangiore biaabo halimu.

7 Anduane Homogo ibu inanaga Ngode Datagaliwabe kagoni.
Ibunaga mana lo ngaruni wali agali dindi bibahendeha bu karume bilonaga lo nga.
8 Ibugua habo nalolene bi lowinigo ngaruni wia ai̱ ai̱ore bulebira.
Ibugua bi lo wialu ogoale bulebero laga bialu lo ngaruni
mani hama porarume handaga bialu karia wia ai̱ ai̱ore bulebira.
9 Ibugua Abarahamala habo nalolene bi lo wialu ^a
Aisagahondo ogoale bulebero lenegobi heneneore bulebira.
10 Anduane Homogo ibugua Isaraelehondo habo nalolene bi lowinigo ^b
ogoni wali agalirume bialu haabo helonaga lowini.
11 Anduane Homogo ibugua Isaraelehondo lalu,
I̱na tíhondo Kenana dindi karulalimulo ngulebero.
Dindi ogoni tíbi tínaga waneigini mani holebirarubi
tíninaga dindi ogoniore halimulo ngulebero, lene.

12 Ala Ngode Datagaliwabenaga wali agali dewa ndo henedaruni
ti emene mbira hangu Kenana dindini hene.
Ti dindi tene ndo mendeali dindini bame igiri yango pu haradagua bini.
13 Ti dindi mbirani baya hangu ho dambolo hene ndo.
Ti togolo yalu pialu dindi wiaruni bibahendeha ge hai haga hene.
Kini mbiragonaga dindiha puwa emene tigimandi dege halu
lone hili yalu pialu kini mende heagonaga dindiha pu halu
ani bigi bialu hene.
14 Ti ani bu ha heagolabi
hameigini maru hongohe hearume ibunaga wali agali uruni hengedope holilono ^c
Ngode Datagaliwabe ibugua ti mamage hene.
Mamage howa ibugua kini hearu talialu
ibunaga wali agali urunihondo kagua mbira bulumini lalu lamini.
15 Ibugua lalu, I̱naga biabe bia haga i̱nime dabene karu mo ko holemini.
I̱naga manalatagi haga karuore mbira ela nahalimu, lene.

16 Anduane Homogohanda ti dindini tomo wiago damene bibahende mo yu ereba hai halu ^d
hina gariore gibi tagira pelene.
17 Ani ibilole howa dege ti maha ibilonaga ^e
ibugua Yosebe ala bamba halu Iyibi dindi pu helene.
Ibu hamene biarume Yosebe ti muni tagu wialu agali maru hearu
tinaga garabaya biabe ale bia haga helo minu mini.
18 Tigua ibunaga ge kirabali pu senime minu huba biagola ^f
ge tandaga timbuni hene.
Ani bialu aeane gendabi mbira ibunaga mani hende hene.
19 O biyadaruni Anduane Homogo ibugua ala Yosebehondo emagaha howa bulebira lamiyadagua
henene tagira pene.
20 Ani biyagola Iyibi dindinaga kini heagome Yosebe gololenaga ^g
agali mbira heagome lama pu lene.
Iyibi dindinaga kini wali agali dewaore haru haga heagome Yosebe golope hene.
21 Golope howa kini biagome ibunaga gabumane agali haguane helo ^h
Yosebe dabo helene.
Dabi helowa Yosebe ibu Iyibi dindi bibahende hearunaga haguane helo helene.
22 Kininaga gabumane haru haga hearubi
kinihondo mitangi talebu miaga hearubi
uruni bibahende de hondowa haru holene hongo ibugua Yosebehondo mini.

23 Mani Yagaba ibu Iyibi dindi pialu ⁱ
ogoriani ho ibira howa hene.
24 Ibu ani hearia Anduane Homogohanda Yagaba hameigini biamogo bialu ^j
ti waneigini dewa tagira íbu helene.
Yagaba hameigini uruni ti hongoheore helalu
tinaga waitigi hearunaga hongo dindiha helo helene.
25 Anduane Homogo ibugua Iyibi wali agalime ibunaga wali agali handabe manga helo helene.
Ani helayagola Iyibi wali agali tigua Anduane Homogonaga biabe biahaga hearu mo hondo hole
henge taya bialu helo helene.

26 Mani Anduane Homogohanda ibunaga biabe biahaga ala dabene Mosesebi Aronobi heba libu haru Iyibi dindi pelene. ^k
27 Puwa libugua Iyibi dindini howa Ngode Datagaliwabenaga biabe hongoheore bialu
manane tara tara agalime nabiagane ale dewa bialu hene.
28 Ngode Datagaliwabehanda aruma holeneme Iyibinaga dindi bu dambi hayagola ^l
wali agali hearu ti arumaha hene.
Iyibi wali agali arumaha hayagoyu tigua Ngode Datagaliwabehanda bidaba layadagua nabi
ibunaga bi mo wahene.
29 Ibugua tinaga iba berearuni mo darama biai halu ^m
wena ibaha berearuni bibahende bo homelai hene.
30 Yago dewaore gibi tidi yalu ibilalu
tinaga dindini yago dege birame helalu ⁿ
kininaga andaga hearuhabi heba yago degeme to̱lotagi helene.
31 Ngode Datagaliwabehanda bungunabi hinabibi alebi tidi yalu pudaba layagola ^o
ti tidi yalu puwa Iyibi dindi damenego pedegone mbira wuwa nahe
bibahendeoreha to̱lotagi hene.
32 Ibugua tinaga dindini dalu ibuni ibi nale ^p
dalu dindi kunibi hari dababi gibiore ibilene.
33 Ogoni ibiyagome Iyibi wali agalinaga mabuni pu mbira lini daga minigerebi hongo wiarubi podai halu
poge ira hearubi podai halu
ti dindini ira hearu damenego bibahendeore podai hene.
34 Ibugua bi hangu layagola pagaya ale dewaore gibi daga labe nahe tidi yalu tagira ibini. ^q
35 Tagira ibuwa tigua dindini tomo bibahende hengearu damenegonaga yuni tugu naiore halu
mbirale andaho hearu damene tene heba na anda hene.
36 Ngode Datagaliwabe ibugua Iyibi wali agalinaga igini wahene damenego bibahende ^r
homelo bo wahai hene.

37 Mani ibugua Isaraele wali agali Iyibi dindi yu wahalu haru tagira pene. ^s
Tinaga giha muni ngoloru silibaru yalu tagira pene.
Isaraele wali agali ti bibahendeore bayale hongohe hangu tagira pene.
38 Iyibi wali agalime Isaraele wali agali hondowa giho henego
Isaraele wali agali tagira pialu piyagola
ti turuore halu dungulo daibu hene.
39 Ngode Datagaliwabehanda hari daligani ibunaga wali agali hearu tigatiga hari beraliba mbira ngelowa ^t
ibunaga wali agali uruni andaneha helene.
Mbiraga harini ira hangu delayagola
ogonime wá hadali hayagola Isaraele wali agali ti wáni bayale hene.
40 Tigua Ngode Datagaliwabehondo tomo noa kama layagola ^u
ibugua ti nelo hariha howa ega de̱wa̱re ale ibilayagola
ti ega uruni balu nene.
Ti tomo nelonaga ibugua dahuliya andaga howa mberedi dalilayagola
ti karulapeore nowa tombeho hene.
41 Ti iba nelonaga to̱le̱ timbuni mbiraha howa iba tagira pelene. ^v
Dindi ko dalu naibagaha iba timbuni biagoni tayandaha dugutagi haradagua bialu
o biagoriani gerai yupe helene.
42 Anduane Homogo ibugua ala bamba howa habo nalolene bi hongohe mbira
ibunaga biabe biahaga Abarahamahondo lowinigo
ogoningi mitangi bini.

43 Anduane Homogo ibugua anidagua bialu
ibunaga wali agali dabeneru haru halu tagira pene.
Haru tagira piyagola ti turu hama iba gana ladaga halu mambolo bama pene.
44 Anduane Homogo ibugua wali agali hameigini tara maru hearunaga dindi wiaru muwa ^w
ibunaga wali agali uruni mo mini.
Wali agali tara uruninaga mabu wiarubi muwa
ibunaga wali agali uruni ti karulelene.
45 Ibugua ogonidagua binidagoni irane
Anduane Homogohanda bi lenedarubi
ibunaga mana lowinidarubi bibahende
Isaraele wali agalime talialu biai helonaga ani bini.
Anduane Homogonaga mini mo yaragaore hama.